BALOREAK TRANSMITITZEN DITUEN HEZKUNTZA

Gure herria pairatzen ari den krisi luze eta sakona marka gogorra uzten ari da hezkuntzan. Hezkuntza arloari ––ikasle, irakasle eta gurasoei–– hain presio gogorra egitera datozen neurrien medioz posible da gure herriko hezkuntza sisteman lortua dugun kalitate maila atzera egiten ikustea. Halere, gizarte garapenaren funtsezko zutabeetako bat kolpatzen ari den egoera larri hau ezin izan daiteke aitzakia hezkuntzaren oinarrizko printzipioak zokoratzeko. Bizikidetza demokratikoko baloreen transmisioak bere lekua izaten jarraitu behar du ikasgeletan, zeren egoera zailenetan ere balore horiek erabakitzen baitute nolakoak izango diren etorkizuneko konponbideak bizitza sozial, ekonomiko eta politikoko arlo guztietan.

Hainbeste urtez terrorismoaren indarkeria pairatzea egokitu zaion gurea bezalako gizarte batean, indarkeria horrek gainera populazioaren zati handi baten oniritzi esplizitua izan duen gizarte honetan, alegia, pentsaezinekoa zaigu balore demokratikoak hezkuntzako eguneroko jardueratik desagertzea eta prestakuntza hori ikasgai ez-ezinbestekotzat edo ideario politiko batekin lotutakotzat hartzea.

Gure Fundazioa sortu zen momentu beretik ikurtzat hartu genuen Baloreetan Oinarritutako Hezkuntza defendatzea portaera antidemokratiko edo intoleranteen aurka egiteko bide bezala. Egin dugun ekarpen xumearen talaiatik debate publikora ekarri nahi dugu gure kezka hau, ezagutzera emanez horretarako gure Fundazioak egin duen ikerketaren emaitza. Ikerketa hori Imanol Zuberok zuzendutako UPV-EHUko Soziologia Departamenduarekin lankidetzan egin dugu eta Elisa Usategi eta Ana Irene del Valle irakasleak izan dira lanaren egileak.

“PRESTATZEN IKASTEN. Baloreak irakasleen hasierako prestakuntzan” izenburuarekin argitara ematen ditugu azken bi urteetan egindako azterketaren emaitzak. Azterketaren helburua izan da jakitea unibertsitateko irakasle ez diren gainerako irakasleen etorkizuneko prestakuntzan zer trataera eman behar zaion baloreetan oinarritutako hezkuntzari. Hala, abiapuntutzat hartuz derrigorrezko hezkuntzako etapa ezberdinetako irakasleei prestakuntza ematen dieten aktoreak, eta beren diskurtso eta esperientzietan oinarriturik, adierak eta irakaskuntzako praktikak aztertu dira, elkarrekin gurutzatuz ikuspegi biak, hots, irakasleena eta ikasleena. Erantzuna aurkitu nahi zaie horrela funtsezko bi konturi: orain ikasle eta gero irakasle izango diren pertsona horiek nola ikusten duten beren papera eta lana baloreetan oinarritutako hezitzaile bezala, eta zer zentzu, garrantzi eta trataera ematen zaien eduki baloratiboei eta etorkizunean irakasle izango direnen prestakuntzan eduki horiek transmititzeari.

Azterketa enpiriko honek, zeinetara igortzen duen argitalpenak, irakasleen prestakuntzaren alderdi bat ikertzen du, zeinak, berria izan ez arren, berebiziko pisu eta munta hartzen baitu gizarteratzeko prozesu eta eragileen jarraikitasun ezak eta zatiketak markatutako gizarte honetan. Gizarte bat, zeinetan eskolak erronka bat duen aurrean: paper proaktiboa jokatzea baloreetan oinarritutako hezkuntzan.

Lan honekin lortu nahi dena ez da bakarrik jakitea zein zentzu, toki eta egoera izan behar lukeen baloreetan oinarritutako prestakuntzak hezkuntza arloan, baina baita ere jakitea zeintzuk diren pertsonen prestakuntza etikoan eskolak izan dezakeen zentzu eta eragina eragotzi, oztopatu edo ezeztatzen duten faktoreak, eta faktore horiek elkarrekin harremanetan jartzea. Ikerketa-lerro horretatik abiatuta proposamenak eta estrategiak osatu nahi dira areago indartzeko eskolaren zentzua eta lana baloreak transmititzeko gune bezala.

LIBURUAREN AURKEZPENA

'APRENDER A FORMAR
Valores en la formación inicial del profesorado'

Urriaren 30ean, Fernando Buesa Fundazioak 'Eskola eta baloreak' bildumako azken argitalpenaren aurkezpena egingo du Gasteizko Canciller Ayala Hotelean. 'APRENDER A FORMAR. Valores en la formación inicial del profesorado', izenburua duen lan honen asmo nagusia da aztertzea zer toki eta trataera izan behar duen baloreetan oinarritutako hezkuntzak unibertsitatez kanpoko etorkizuneko irakasle guztien prestakuntzan.

Aurkezpen ekitaldian gurekin izango dira Sara Buesa, Fernando Buesa Fundazioaren presidenteordea eta azterketa egin duten Imanol Zubero, Ana Irene Del Valle eta Elisa Usategui UPV-EHUko Soziologia Departamenduko irakasleak.

Argitalpen honekin bukatzen den hezkuntza arloko ikerketa-lerroaren asmoa izan da jakitea zein faktorek duten eragina baloreetan oinarritutako hezkuntzaren arloko arazoetan eta nolako ahalmena izan dezakeen hezkuntza mota horrek eskolako inklusio eta kohesio soziala bultzatzeko estrategia bezala.

Ekitaldira doazen guztiei liburu bana emango zaie eta sarrera doakoa izango da aulkiak bete arte.

'APRENDER A FORMAR' liburuaren aurkibidea

'APRENDER A FORMAR' liburuaren aurkezpena

 Alumnos y víctimas escriben el 'relato de la escuela' sobre el fin del terrorismo Diario vasco 2012/09/02. Dokumentuaren hizkuntza: GAZTELANIA

Víctimas del terrorismo intentan superar sus miedos en el Campus de Paz Estrella Digital 2012/09/16. Dokumentuaren hizkuntza: GAZTELANIA

 Las víctimas, en un momento crucial. MARTA, CARLOS Y SARA BUESA RODRÍGUEZ El Correo 2012/09/23 Dokumentuaren hizkuntza: GAZTELANIA