Elkarbizitzak adostasunak behar ditu

Joan den ekainaren 8an Eusko Jaurlaritzak Bizikidetza Demokratikorako eta Indarkeriaren Deslegitimaziorako Plana onartu zuen. Plan izugarri garrantzitsu horrekin garatu egiten da Eusko Legebiltzarrean ordezkatuta dauden alderdi guztiek aho batez onartutako Terrorismoaren Biktimei Aitorpena eta Erreparazioa Egiteko 4/2008 Legean aurreikusitakoa.

Plan horrek garrantzi handia dauka, terrorismoa borrokatzeko ez baita nahikoa komandoak atxilotzea. Horrezaz gain, indartu egin behar dira askatasuna, justizia, aniztasunaren errespetua eta elkartasuna bezalako baloreak, balore demokratikoak alegia. Legitimazioa eman behar zaie Zuzenbide Estatuari eta bere oinarrian dauden bizikidetza itunei, eta deslegitimatu egin behar dira indarkeria terrorista eta haren bitartez bilatzen diren helburu politikoak, 4/2008 Legean honela definitzen direnak: “proiektu totalitario eta baztertzaile bat inposatzea”. Gauza horiek guztiak daude arestian aipatutako Plan horretan.

Gure Fundazioak, terrorismoaren biktimen beste elkarte eta fundazioekin batera, komunikatu bat sinatu zuen geure poza azaltzeko Planaren edukiagatik eta Legebiltzarreko taldeei eskatzeko euts diezaiotela 4/2008 Legea onartzera eraman zuen itunaren espirituari. Baina ohartzen hasita gaude, ez kezkarik gabe, adostasun espiritu hura ez dela agertu Planaren onespenean.

Lehenengo eta behin, eskerrak eman nahi dizkiegu Plan hori aurrera ateratzen lagundu duten taldeei, funtsezkoa iruditzen baitzaigu, euskal gizartearen etorkizuneko bizikidetzarako, Plan hori indarrean izatea eta aplikatua izatea. Eta –errespeturik handienarekin diogu–, kezkaz betetzen gaitu Biktimen Legea eztabaidatu zenean lortutako adostasunak hausten ikusteak, eta haustura hori zuritzeko erabiltzen ari diren argudioak entzuteak.

Demokrazia defendatzea, bere erakundeak eta geure buruari askatasunez eman dizkiogun bizikidetza itunak defendatzea, ez da doktrinatzea, baizik eta askatasuna defendatzea totalitarismoaren eta bazterkeriaren aurka, Biktimen Legeak agintzen duen bezalaxe. Lege horrek 2. artikuluan zehazten du zer den terrorismoaren biktima bat eta terrorismo guztiak gaitzesten ditu, bai duela hogei urtez goiti desagertu ziren erakunde terroristak –GAL, Triple A, Batallón Vasco-español etab.–, bai gaur egun bizirik dagoen erakunde terrorista bakarra, ETA. Editorial honen hasieran genioen bezala, lege hori aho batez onartu zen. Eta printzipio horiek berak, Bizikidetza Planean berriro agertzen direnak, zalantzan jartzen dituzte orain legea idatzi zenean ontzat eman zituzten zenbaitek.

Horregatik gaude hain kezkatuta ikustean nola bake, askatasun eta demokraziako bizikidetzaren alde lortuta zeuden oinarrizko adostasunak, aipatutako legearen 9. artikuluan jasota daudenak eta gure ustez alderdien aurretikoak direnak, hautsita geratu diren batzuen eraginez, ez dugu ulertzen zeren izenean.

Baina kezka hori gorabehera, azpimarratu nahi dugu Plan horren garrantzia, eta adierazi ados gaudela bere edukiarekin eta pozik gehiengo handi baten babesa lortu duelako. Era berean, dei egin nahi diegu alderdi politiko guztiei berriro ados jar daitezen Planean aurreikusitako ekintzak abian jartzeko orduan.

Natividad Rodríguez, Fernando Buesa Blanco Fundazioaren Presidentea
 

"La visibilidad social y política de las víctimas del terrorismo" liburuaren aurkezpena